影靚PW，最重要既係有個CP值高既攝影師

今日收到上星期幾張香港PW相，即刻心心眼，忍唔住寫個Blog同大家分享下~ 話說係我開始籌備影婚紗相既時候，我個時心大心細咁諗去邊個國家影相好，從來都冇諗過係香港影直至我留意到呢間攝影公司，影出黎既相偏向自然，唔做作，加上影出黎個效果好正，正正係我中意既style。心諗估唔到係香港都可以影到咁靚。第一時間問左呢一間攝影師Keith最快既拍攝時間，佢覆我5月。雖然香港5月既天氣未算最熱，不過長期戶外曝曬已經足夠令人卻步⋯我考慮左一陣，真心覺得好難搵個CP值咁高既攝影師，最後我都說服左我男朋友係5月頭影相。到５月頭，天文臺已經預告黎緊成個星期都會落大雨。我每日都留意天氣預報，希望影相嗰日唔好落大雨。Keith係影相前幾日都一直問我改唔改期，直至影相前一晚11點幾都仲問我多一次，Keith真係好好人。但係由於我一早已經拎左婚紗同花球擺左係屋企；如果改期，我怕會有extra cost去租裙，又怕男友係未來幾個月𥚃面影相會熱到中暑，所以我最後都冇改期，放手一搏。天文台直至拍攝前一日都仲講之後嗰日會落雨，我嗰幾日其實真係好擔心。到影相當日，天公造美，朝早竟然放啨，超好天，直到3、4點先開始多雲。我同男友都已經覺得好安慰，起碼冇落雨。但係，另一個問題出現啦，就係我唔習慣望住鏡頭影相。剛剛一開始，我表現應該都幾麻麻。不過Keith同化妝師 Sonia人好nice，又professional，我地全程都有傾有講，過程都好愉快。其實當晚影完PW，我心裡面都仲好擔心會影得唔好同會影到好怪。不過Keith影相當晚已經即刻send左幾幅相俾我，向我派定心丸。我睇完真係覺得有驚喜